یازار:سینا حسنی

آغا محمد خانین آذربایجان خانلیقلارینی بیرلشدیرمه‌یه دعوتی

۱۹-جو عصرین سونلارینا یاخین آذربایجان اؤزونون ان چتین و تلاتوملو گونلرینی یاشاییردی. روسییا ایشغال تهلوکه‌سینین گئتدیکجه گوجلندیی بیر شرایطده آذربایجان خانلاری بیرلشمک، عمومی دوشمه‌نه قارشی البیر فعالیت گؤسترمک اوزینه بیر-بیرلری ایله موباریزه آپاریردیلار. خاریجی قوه‌لرین تحریکی، کؤهنه اداوت هیسسلرینین باش قالدیرماسی خانلیقلار آراسی چکیشمه‌لری داها دا گوجلندیریردی. آذربایجانین قوزئی تورپاقلاریندا گوجلو حربی-سیاسی قوروما چئوریلمیش قاراباغ خانلیغی دیگر خانلیقلاری اؤز اطرافیندا بیرلشدیرمک اوزرینه، گنجه خان‌لیغینی اله کئچیرمه‌یه چالیشیردی. قوبالی شیخ علی خان و شکیلی محمد حسن خان شاماخی‌لی مصطفی خانلا اداوت آپاریردیلار.

بئله بیر شرایطده ایراندا و آذربایجانین جنوب تورپاقلاریندا حاکمیتی اله آلمیش آغا محمد خان قاجار صفوی دؤولتینین تورپاقلارینی یئنیدن بیرلشدیرمک سیاستی یئریدیردی. دؤورونون مودور و اوزاق گؤرن سیاسی خادیمی اولان آغا محمد خان روسییانین آذربایجان تورپاقلارینی ایشغال ائتمک پلانلاریندان یاخشی خبردار ایدی. بو پلانلارین حیاتا کئچیریلمه‌سینین آذربایجان خالقی اوچون نئجه فلاکتلر تؤره‌ده‌جه‌یینی ده گؤزل آنلاییردی.

آغا محمد خان دوشونوب باشا دوشوردو کی، حربی-سیاسی و اقتصادی جهتدن ضعیف اولان خانلیقلار ۲-اینجی یئکاتئرینانین دؤورونده یئنیدن گوجلنمیش روسیایا مقاویمت گؤسترمک اقتداریندا دئییللر. اونا گؤره ده اونلارا بیرلشمه‌یی، عمومی دوشمه‌نه قارشی بیرجه موباریزه آپارماغی تکلیف ائدیردی.

لاکین خانلیقلارین بؤیوک اکثریتینین قاجارلار سولاله‌سینین ایداره ائتدیی دؤولتده قطعی بیر حالدا بیرلشمک فیکری یوخ ایدی. روسیا پرست قوه‌لرین تأثیری آلتیندا اولان قاراباغ، شکی، ناخچیوان خان‌لیقلاری آغا محمد خانین تکلیفینی قبول ائتمکدنسه، روسیا ایله یاخینلاشماغین یوللارینی آراییردیلار.

بو حادثه‌لری دقتله ایزله‌یه‌ن آغا محمد خان صبر و تمکین نوماییش ائتدیریر، گئنیش تبلیغات ایشی آپاریر، خانلاری دانیشیقلار یولو ایله بیرلشمه‌یه دعوت ائدیردی. قاجارین ائلچیلری ایبراهیم خلیل خانین، کلبلی خانینی، محمدحسن خانین سارایلارینا آیاق قویور، اونلاری گؤزله‌ین تهلوکه باره‌سینده خبردارلیق ائدیر، تاکیدله آغا محمد خانلا بیرلشمه‌یه چاغیریردیلار.

لاکین خانلارین اکثرییتی بو دعوتی قبول ائتمیر، کؤمک اوچون روسیایا مراجعت ائدیردیلر. بونونلا دا اونلار گله‌جکده دوچار اولاجاقلاری بؤیوک فلاکتلرین اساسلارینی قویوردولار.

تیموچین آذربایجانلی:یازار